हिवाळा

मान्य आहे मला,  

तुला नाही दिल मी पहिल वहिलं काही ,

तो पहिला आवेग , 

ती पहिली मिठी , 

ती स्पंदनाची अविरत धडधड 

तो हातातला उष्ण स्पर्श ज्याने तू वितळून जावस ,

मान्य आहे मला तुला नाही दिल ,

पहिला चिंब पाऊस , 

गारठलेल्या ओठांना 

माझ्या ओठांच मऊ लोकरी पांघरूण ,

रणरणल्या काहिलीला नाही झाकल 

माझ्या ओंजळीने , 

पहिल वहिलं नाहीच दिल तुला काही 

पण तुला माहितेय ?

मी  ठेवलाय माझा "एक हिवाळा " 

फक्त तुझ्या साठी राखून , 

जेव्हा पानगळ येयील 

आणि संध्याकाळ कातर होईल 

तेव्हा माझ्या मिठीत तुला नी तुलाच सगळ मिळेल 

शेवटचा आवेग , 

शेवटची मिठी , 

शेवटचा चुकता ठोका 

तुझ्यासाठी … 

शेवटचा हिवाळा राखून ठेवलाय …

अनुजा